_____________________________________
З людзьмі і для людзей
+375-1591-78837 231201 ул. Пионерская, 5 г. Островец
Актывісты пярвічак прафсаюзнай арганізацыі работнікаў адукацыі і навукі засталіся ў захапленні ад турыстычнага падарожжа ў горад Гедыміна – Ліду.
Лідскі Крыжаўздзвіжанскі фарны касцёл, курган Бессмяротнасці, кафедральны сабор Святога Міхаіла Арханёла, помнікі Гедыміну і Францыску Скарыне – падчас агляднай экскурсіі па гораддзе госці з Астравеччыны не толькі пабачылі прыгожыя мясціны і помнікі архітэктуры, але даведаліся шмат цікавага пра Ліду і яе мінулае.
– Асабіста я адкрыла для сябе Ліду з новага боку, хоць і была ў гэтым горадзе шмат разоў: экскурсавод паведаміла столькі цікавых фактаў і легенд! Было бачна, што яна не проста ведае гісторыю Ліды, але захапляецца і ганарыцца, што тут жыве, – адзначыла старшыня прафсаюзнай арганізацыі работнікаў адукацыі і навукі Марына Кутовіч.
Акрамя гэтага, астраўчане наведалі турыстычны комплекс “Вольны мельнік”, дзе пабачылі калекцыю прасаў, гербы Ліды розных часоў, змаглі прымерыць рыцарскія даспехі. Уражанняў хапіла на ўсю дарогу дадому і нават больш.