Педагогі астравецкай гімназіі №1 далучыліся да педагагічных чытанняў асацыяцыі школ Расіі і Беларусі

Кіраўніцтва і настаўнікі гімназіі №1 удзельнічалі ў педагагічных чытаннях асацыяцыі школ Расійскай Федэрацыі і Рэспублікі Беларусь.

– Чытанні пад назвай «Патрыётамі не нараджаюцца» праходзілі ў анлайн-фармаце. Гісторыя нашых краін сведчыць аб тым, што ва ўсе часы адным з галоўных фактараў, якія забяспечвалі згуртаванасць народа, дапамагалі пераадолець цяжкасці і нягоды, былі любоў да Радзімы, свайго народа, імкненне служыць інтарэсам Айчыны. Таму выхаванне патрыятызму застаецца ў цэнтры ўвагі педагогаў, – адзначыла дырэктар гімназіі №1 Жанна Янцэвіч.

Выхаванне патрыётаў і грамадзян – адзін з асноўных напрамкаў работы асацыяцыі, якая штогод праводзіць дзясяткі сумесных мерапрыемстваў і конкурсаў для вучняў Расіі і Беларусі.

– У кожнай установе ёсць і ўласныя напрацоўкі па гэтым накірунку выхаваўчага працэсу. А ўдзел у педагагічных чытаннях – выдатная магчымасць расказаць пра свае праекты і методыкі, пазнаёміцца з вопытам калег, – упэўнена Жанна Леанардаўна.

Да слова, сёлета ў мерапрыемстве ўдзельнічала 96 устаноў асацыяцыі, 71 з якіх – установы адукацыі Беларусі.

Для даведкі

Асацыяцыя школ Расійскай Федэрацыі і Рэспублікі Беларусь заснавана ў снежні 2020 года. Гэта аб’яднанне дапамагае развіваць супрацоўніцтва і ўмацоўваць сяброўства паміж нашымі краінамі.