+375-1591-78837 
231201 ул. Пионерская, 5 г. Островец
За пуцёўку на ўдзел у беларуска-расійскай культурна-адукацыйнай акцыі «Цягнік Памяці 2025» спаборнічалі юныя жыхары раёна – адборачны конкурс «Я патрыёт сваёй краіны» прайшоў у Астраўцы.
Удзельнікі
Ангеліна Врублеўская вучыцца ў СШ №1. Захапляецца маляваннем, любіць чытаць дэтэктывы. Актыўны ўдзельнік валанцёрскіх праектаў – такая дзейнасць напаўняе яе энергіяй, бо, лічыць канкурсантка, дабро дабром адгукнецца.
Школьніца марыць, каб Беларусь квітнела, і для гэтага трэба няшмат: каб кожны адчуваў адказнасць за будучыню краіны і рабіў нешта на яе карысць.
Жыццёвае крэда: кожны крок мае значэнне.
Думкі ўслых
Маладосць – гэта… жыццё: актыўнае, вясёлае, цікавае.
Заўтра залежыць… ад нас. Які шлях чалавек выбірае, з якім настроем крочыць па жыцці, такім будзе яго лад жыцця, унутраны свет і акружэнне.
Мары здзяйсняюцца… калі ты пачынаеш нешта для гэтага рабіць, абдумваючы і аналізуючы кожны крок.
Сваім прыкладам… паказаць пазітыўнае стаўленне да жыцця; няўдачы – гэта толькі вопыт, а не трагедыя.
Дар’я Кашына вучыцца ў СШ №2.
Член БРСМ, дзіцячага парламента, вучаніцкага савета і валанцёр. Удзельнік розных праектаў, акцый, арганізатар і ініцыятар шматлікіх мерапрыемстваў, пераможца алімпіяд і даследчых конкурсаў. Лічыць сябе шчаслівай, бо атулена любоўю родных і смела глядзіць у будучыню. Ідзе па жыцці ўпэўнена, марыць і дзейнічае.
Хоча, як і дзед-франтавік, стаць медыкам, каб дапамагаць людзям.
Жыццёвае крэда: жыццё – захапляючае падарожжа, і ў кожнага свой маршрут – трэба прайсці яго годна.
Думкі ўслых
Маладосць – гэта… маё цяперашняе, мае думкі. Гэта час станаўлення асобы.
Заўтра залежыць… толькі ад самаго сябе: думак, учынкаў, дзеянняў, людзей, якімі ты сябе акружыў.
Мары здзяйсняюцца … калі ты сам гэтага хочаш.
Сваім прыкладам… хачу паказаць, што шлях адольвае той, хто ідзе.
Іван Шышкевіч вучыцца ў СШ №3. Выхаванец ваенна-патрыятычнага клуба “Адзінства”, актыўны ўдзельнік БРСМаўскага руху, валанцёр, вядучы раённых мерапрыемстваў. Хоча стаць ваенным, каб служыць Радзіме.
Лічыць, што жыццё трэба не празяхаць, а напаўняць добрым сэнсам кожны дзень і кожную гадзіну. Упэўнены, што ён адлюстраванне свайго народа. А галоўны арыенцір для юнака – яго бацькі.
Жыццёвае крэда: усё залежыць ад нас.
Думкі ўслых
Маладосць – гэта… пачатак шляху ў дарослае жыццё і выбар свайго месца ў ім.
Заўтра залежыць… ад моладзі. Ад яе залежыць будучае краіны – шчаслівае, квітнеючае, тое, у якім будзе месца павазе да гісторыі, любові да роднай зямлі, народа.
Мары здзяйсняюцца… калі ты ў іх верыш і імкнешся зрабіць іх рэальнасцю. Для гэтага трэба працаваць, і шмат.
Сваім прыкладам… і адносінамі да жыцця, людзей хачу паказаць, што я той, на каго можна раўняцца, да каго можна прыйсці за дапамогай.
Надзея Бразевіч вучыцца ў Гервяцкай СШ. Захапляецца валейболам, іграе на фартэпіяна, спявае, малюе.
Лічыць, што жыццё па-рознаму можна пражыць: своечасова есці, піць, часам рабіць гадасці. А можна і так: любіць свет, людзей, жывёл, даражыць мінулым і імкнуцца зрабіць лепшым дзень сённяшні. Дзяўчына выбрала другі варыянт, бо хоча быць для краіны надзейнай апорай.
Жыццёвае крэда: хто, калі не я.
Думкі ўслых
Маладосць – гэта… час адкрыццяў і эксперыментаў у пошуках свайго месца ў грамадстве.
Заўтра залежыць… толькі ад мяне: настрой, планы, іх рэалізацыя -- ніхто лепш за мяне не зразумее, чаго я хачу.
Мары здзяйсняюцца … калі ты ідзеш да пастаўленай мэты. Ёсць мары доўгатэрміновыя, на якія пойдзе большая частка жыцця, – і гэта нармальна.
Сваім прыкладам… хачу паказаць, што наша шчасце ў нашых руках.
Лада Тарашкевіч вучыцца ў педагагічным класе Варнянскай СШ.
Выхаванка ваенна-патрыятычнага клуба “Адзінства”, актывістка БРСМ і маладзёжнага аб’яднання выратавальнікаў-пажарных, валанцёр, баец экаатрада, удзельнік навукова-практычных канферэнцый і конкурсаў. Захапляецца танцамі і спевамі.
Марыць быць шчаслівай і прыносіць карысць сваёй зямлі.
Жыццёвае крэда: рабі так, каб будучыня была лепшай за мінулае.
Думкі ўслых
Маладосць – гэта… вера ў мары, іх ажыццяўленне і асалода ад жыцця.
Заўтра залежыць… ад сёння: якія прыярытэты расставіш, якія планы выстраіш, такім будзе курс наступнага дня.
Мары здзяйсняюцца… калі ў іх верыш і прыкладаеш максімальныя намаганні, каб іх здзейсніць. Чараўнікі свайго жыцця мы самі.
Сваім прыкладам… паказваю, што карысць грамадству, сваёй зямлі можа прыносіць любы чалавек, незалежна, школьнік гэта ці дарослы.
Мацвей Масевіч вучыцца ў Альхоўскай СШ.
Выступае ў школьнай самадзейнасці: тэатралізаваных пастаноўках і спектаклях. Захапляецца футболам і валейболам. Спорт для хлопца – хобі, якое вучыць дысцыплінавасці і мэтанакіраванасці.
Галоўная апора ў жыцці – сям’я, яна і крыніца натхнення, і падтрымка.
Школьнік хоча паступіць у Ваенную акадэмію і ахоўваць бяспеку сваёй краіны.
Жыццёвае крэда: ключ да поспеху – работа над сабой.
Думкі ўслых
Маладосць – гэта… бесклапотны час у параўнанні з дарослым жыццём. Час памылак і набівання шышак, а таксама жыццёвых адкрыццяў.
Заўтра залежыць … ад мэт, якія перад сабой ставіш , і гатоўнасці працаваць на іх дасягненне.
Мары здзяйсняюцца … калі на іх працуе не нехта, а ты -- у гэтым галоўная каштоўнасць. Ёсць такія, якія залежаць выключна ад самаго чалавека, а ёсць такія, на якія трэба пашчыраваць камандай.
Сваім прыкладам… кожны каваль свайго шчасця.
Дар’я Статкевіч вучыцца ў Гудагайскай СШ.
Актывістка БРСМ, выхаванка ваенна-патрыятычнага клуба “Адзінства”. Адчувае сябе ў любой справе як рыба ў вадзе.
Упэўнена, што калі ісці да сваёй мэты, усё абавязкова атрымаецца, толькі трэба верыць у сябе. Жыццё рознае: бываюць дасягненні і перамогі, расчараванні і жыццёвыя нягоды, самае галоўнае, лічыць дзяўчына, – выносіць з ўсяго гэтага правільныя ўрокі.
Жыццёвае крэда: рухацца наперад і весці за сабой іншых.
Думкі ўслых
Маладосць – гэта… назапашванне жыццёвага вопыту і імкненне спазнаваць шмат новага.
Заўтра залежыць… ад нас саміх: мы самі вырашаем, што будзем рабіць заўтра і як завяршым сённяшні дзень.
Мары здзяйсняюцца … калі для гэтага прыйдзе час, пры гэтым на іх трэба папрацаваць і ўмець чакаць.
Сваім прыкладам… вяду за сабой, удзельніца ВПК, мой партрэт на Дошцы гонару лепшых выхаванцаў, для школы заваёўваю прызавыя месцы на спаборніцтвах і праслаўляю родны край сваімі поспехамі.
Ксенія Ярохіна вучыцца ў гімназіі №1.
Любіць выступаць на сцэне, удзельніца шматлікіх конкурсаў. Ва ўсіх пачынаннях абапіраецца на падтрымку сям’і. Дзяўчына хоча крочыць па жыцці правільным шляхам і накіроўваць на яго іншых.
Яна не баіцца марыць пра немагчымае, бо, упэўнена, менавіта з дзіцячых мрояў нараджаюцца вялікія адкрыцці.
Жыццёвае крэда: кожны можа змяніць свет да лепшага.
Думкі ўслых
Маладосць – гэта… смеласць няспынна ісці за марай і час для прыемных адкрыццяў.
Наша заўтра залежыць … ад нашых учынкаў, таму, перш чым нешта зрабіць, трэба падумаць, як гэта адгукнецца.
Мары здзяйсняюцца … калі ты не сядзіш і чакаеш, а робіш для гэтага ўсё магчымае. І падтрымка тут не будзе лішняй.
Сваім прыкладам… пакажу, як зберагчы памяць пра тых, хто адстаяў свабоду нашай зямлі (я удзельнік мітынгаў, патрыятычнай канцэртаў і конкурсаў песні).
ПЕРАМОЖЦЫ
1-е месца – Іван Шышкевіч.
2-е месца – Дар’я Кашына.
3-е месца – Лада Тарашкевіч.
Удзельнікі конкурсу атрымалі падарункі ад салона “На связи”, магазіна “ЧэмпіёнСпорт”, фатографа Анастасіі Мядэйшы, шакалацье Іны Субач, беларускай партыі “Белая Русь”, раёйнных ГА БРСМ і БРПА, “Белая Русь”, “Беларускі саюз жанчын”.
Для даведкі
Акцыя прысвечана Перамозе ў Вялікай Айчыннай вайне. Яе ўдзельнікі наведаюць 15 гарадоў Беларусі і Расіі. Сустрэчы з ветэранамі, экскурсіі ў музеі, рэканструкцыі ваенных падзей, культурныя мерапрыемствы… -- шмат цікавага і пазнавальнага чакае юных патрыётаў, якія атрымаюць квіток на незвычайны цягнік.
25 сакавіка Іван Шышкевіч выступіць на абласным этапе, які пройдзе ў Гродне. Няхай яму пашчасціць атрымаць там квіток на “Цягнік Памяці”!
